Хярзангийн урагдал гэж юу вэ?

Хярзангийн урагдал гэж юу вэ?

Хярзангийн урагдал нь эмэгтэйчүүдийн бэлэг эрхтний анхаарал татсан асуудлын нэг юм. Төрөх явцад, эсвэл дараа нь үтрээний үүдэвч болон хошногоны амсарт , үтрээний орчимд үүссэн гэмтэл нь хярзан урагдах шалтгаан болдог. Хярзан нь төрөх үед үтрээг тэлэх, хүүхдийн төрөх замыг амар болгох үүрэгтэй байдаг ч, зарим тохиолдолд хэт их даралт болон өөрчлөлтөөс үүдэн гэмтэж, урагддаг. Энэ нь биеийн болон сэтгэл зүйн хувьд эмэгтэйчүүдийн амьдралд сөргөөр нөлөөлөх нь элбэг.

Хярзангийн урагдал үүсэх шалтгаанууд

Хярзан урагдах нь ихэвчлэн төрөх явцад үүсдэг. Төрөх үед үтрээний сувгаар хүүхдийн толгой болон бие өнгөрөх үед хярзан их хэмжээгээр сунаж тэлээд буцаад агших үүрэг гүйцэтгэдэг. Гэвч зарим тохиолдолд хэт их хэт даралт болон хурдтай төрөх явцад хярзан гэмтэж урагдана. Энэ нь хүүхдийн төрөх байрлал, хүүхдийн толгойн хэмжээ зэргээс хамаарах бөгөөд үр дүнд нь хярзан дахь олон булчингийн ажиллагаа алдагдах, урагдах эрсдэлтэй.

Хярзангийн урагдалтай холбоотой эрүүл мэндийн асуудлууд

Хярзан урагдсан эсвэл хуучин оёдлын сорви нь нөхөн сэргээлгүй орхисон тохиолдолд дараах сөрөг үр дагаврууд үүсэж болно:

1️⃣ Бэлгийн харьцааны үеийн зовиур

• Өвдөлт мэдрэгдэх: Төрсний дараах урагдал нь бэлгийн харьцаанд орох үед өвдөлт үүсгэж болно. Энэ нь тухгүй мэдрэмж үүсгэдэг бөгөөд эмэгтэйчүүдийн сэтгэл санааг ч зовоох шалтгаан болдог.
• Тав тухгүй байдал үүсэх: Үтрээний булчин суларч, хананы бүтэц өөрчлөгдөх нь бэлгийн харьцааны үед тав тухгүй байдал үүсгэдэг. Бие махбодийн болон сэтгэл зүйн хувьд эмэгтэйчүүдэд үтрээнээс хий гарах, сул мэдрэгдэх, унжих мэдрэмж үүсэх гэх мэт хүндрэл үүсэх нь элбэг.

2️⃣ Үтрээний булчингийн сулрал

• Үтрээний булчингийн сулрал нь үтрээний хананы бүтэц өөрчлөгдөхтэй холбоотой. Үр дагавар нь бэлгийн харьцаанд орох үед мэдрэмж буурч болдог. Төрсний дараах урагдал нь энэ асуудлыг улам гүнзгийрүүлж, үтрээний хананы уян хатан чанарыг алдагдуулж болзошгүй.

3️⃣ Байнгын үрэвсэл үүсэх магадлал

• Хярзангийн урагдал нь үрэвсэл дахин давтагдах эрсдэлтэй. Үтрээний хана болон үтрээний үүдэвч нь хамгаалалтын үүрэг гүйцэтгэдэг бөгөөд гэмтэл үүссэн, бүрэн бүтэн байдлаа алдсан үед халдвар орох эрсдэл нэмэгддэг. Шулуун гэдэснээс дээш өгсөх замын халдвар үрэвсэл үүсгэнэ. Мөн бэлгийн замын халдвар авах эрсдэл ч бий болгоно.

4️⃣ Шээс задгайрах эрсдэл нэмэгдэх

• Давсагны дэмжлэг буурах нь шээс задгайрах эрсдэл үүсгэж болно. Үтрээний булчингийн үйл ажиллагаа суларснаар шээс алдах шинж тэмдэг үүсч, эмэгтэйчүүдийн өдөр тутмын амьдралд төвөг учруулах эрсдэлтэй.

5️⃣ Гоо сайхны таагүй мэдрэмж

• Хярзан урагдал нь гадна төрх өөрчлөгдөх асуудал үүсгэдэг. Бэлэг эрхтний гадна хэлбэр нь өөрчлөгдөж, өөртөө итгэх итгэл буурах явдал гарч болзошгүй. Энэ нь сэтгэл зүйн хувьд сөргөөр нөлөөлж, эмэгтэйчүүдийн амьдралын чанарт ихээхэн нөлөөлж болох юм.

Нөхөн сэргээх мэс засал

Хярзангийн урагдал нь эрүүл ахуйн болон гоо сайхны талаас ч томоохон асуудал болдог. Тиймээс нөхөн сэргээх мэс засал хийх нь чухал юм. Мэс засал нь хярзангийн бүтцийг эргэн сэргээж, үтрээний булчингийн ажиллагааг сайжруулж, хэвийн үйл ажиллагааг хангах зорилготой. Энэ мэс засал нь өвдөлтийг бууруулж, үтрээний хананы бүтцийг сайжруулан үрэвсэл, халдварын эрсдлийг бууруулахад тусалдаг. Мөн энэ нь өдөр тутмын амьдралын чанарыг сайжруулж, эмэгтэйчүүдийн өөртөө итгэх итгэлийг нэмэгдүүлдэг.

Зөвлөмж

Хярзангийн урагдал нь эмэгтэйчүүдийн нөхөн үржихүйн эрхтнүүдийн эрүүл мэндэд ихээхэн нөлөө үзүүлж болох асуудал бөгөөд зөвхөн гоо сайхны төдийгүй эрүүл мэндийн хувьд ч анхаарах шаардлагатай байдаг. Мэргэжлийн эмчийн зааварчилгаа, эмчилгээ нь хамгийн сайн үр дүнг өгч, нөхөн сэргээх мэс засал нь эрүүл мэндийг эргэн сэргээж, амьдралын чанарыг сайжруулахад чухал үүрэг гүйцэтгэнэ.